Náðu 4. sæti á heimsmeistaramóti ungra bakara
Ísland átti fulltrúa á heimsmeistaramóti ungra bakara í Berlín sem fram fór síðastliðinn föstudag. Bakaranemarnir Matthías Jóhannesson og Finnur Guðberg Ívarsson kepptu fyrir Ísland og höfnuðu í 4. sæti. Um er að ræða 50 ára afmæli keppninnar og var Ísland í fyrsta sinn að taka þátt. Íslenska liðið fékk sérstök aukaverðlaun sem „besta nýja þjóðin“. Árni Þorvaldsson, fagkennari í MK, var þjálfari liðsins og Sigurður Már Guðjónsson, formaður Konditorsambandsins, var dómari fyrir hönd Íslands.
Að sögn Sigurðar er þetta einstaklega góður árangur bakaranemanna. Keppendurnir eru 17 og 19 ára en hvorugur er búinn að taka sveinspróf ennþá og því ekki enn orðnir útskrifaðir bakarar.
Bakaranemarnir Matthías Jóhannesson og Finnur Guðberg Ívarsson.