Ný stjórn Félags ráðgjafarverkfræðinga
Aðalfundur Félags ráðgjafarverkfræðinga fór fram í morgun í Húsi atvinnulífsins. Á fundinum fór Reynir Sævarsson, fráfarandi formaður félagsins, yfir helstu áherslur og störf félagsins á starfsárinu. Meðal helstu áherslumála er uppbygging innviða en félagið auk SI gaf á árinu út þriðju skýrsluna um ástand og framtíðarhorfur innviða á Íslandi. Skýrslan hefur sem fyrr verið afar mikilvægt innlegg í umræðuna um viðhald og uppbyggingu innviða.
Nína María Hauksdóttir, COWI, fór yfir skýrslu stjórnar Yngri ráðgjafa sem er deild innan FRV. Yngri ráðgjafar leggja áherslu á tengslamyndun starfsfólks innan verkfræðistofanna sem er yngra en 40 ára og að kynna starf ráðgjafarverkfræðinga út á við, þá helst til framhalds- og háskólanema.
Á fundinum voru fráfarandi stjórnarmönnum, þeim Reyni Sævarssyni, sem áður var formaður, Hirti Sigurðssyni og Gunnari Sverri Gunnarssyni, sem var varamaður í stjórn á starfsárinu, færðar þakkir fyrir afar vel unnin störf í þágu félagsins en þeir hafa allir tekið þátt í stjórnarstarfinu um nokkurra ára skeið. Þá var Sandra Rán Ásgrímsdóttir, COWI, kjörin formaður félagsins til tveggja ára, Ólafur Ágúst Ingason, Eflu, kjörinn meðstjórnandi til tveggja ára og Runólfur Þór Ástþórsson, VSÓ Ráðgjöf, kjörinn varamaður til eins árs. Fyrir í stjórn, til aðalfundar 2026, sitja Bóas Eiríksson, Lotu, Guðrún Dröfn Gunnarsdóttir, Verkís, og Haukur J. Eiríksson, Hnit - Artelia Group.
Eyrún Arnarsdóttir, viðskiptastjóri á mannvirkjasviði SI, annaðist fundarstjórn.
Nýkjörin stjórn FRV, talið frá vinstri, Sandra Rán Ásgrímsdóttir, formaður, Guðrún Dröfn Gunnarsdóttir, Verkís, Bóas Eiríksson, Lotu, Ólafur Ágúst Ingason, Eflu, Haukur J. Eiríksson, Hnit – Artelia Group, Runólfur Þór Ástþórsson, VSÓ Ráðgjöf.
Sandra Rán Ásgrímsdóttir, COWI, nýkjörinn formaður FRV.
Ólafur Ágúst Ingason, Eflu, nýkjörinn í stjórn FRV.
Nína María Hauksdóttir, COWI, stjórnarmaður í Yngri
ráðgjöfum flytur skýrslu YR.
Reynir Sævarsson, Eflu, fráfarandi formaður, flytur
skýrslu stjórnar.
Gunnari Sv. Gunnarssyni, COWI, Hirti Sigurðssyni,
Mynstru, og Reyni Sævarssyni, Eflu, voru færðar þakkir fyrir afar vel unnin
störf í þágu félagsins.