Eftirspurn eftir raforku fer vaxandi með aukinni fólksfjölgun, orkuskiptum og auknum umsvifum í atvinnulífinu. Undanfarna daga hefur forstjóri Landsnets vakið athygli á yfirvofandi hættu á orkuskorti með tilheyrandi skerðingum. Önnur orkufyrirtæki hafa tekið undir þetta. Vinna við raforkuspá er í höndum Orkustofnunar sem gefur út nýja orkuspá árlega. Ekki er rætt við notendur um þeirra áform og því hefur spáin misst marks undanfarin ár. Þetta segir Sigurður Hannesson, framkvæmdastjóri SI, í grein sinni í Fréttablaðinu í dag undir yfirskriftinni Orkuspá missir marks.
Sigurður segir að óhætt sé að taka undir gagnrýni forstjóra Landsnets á umrædda starfshætti og slagsíðu varðandi orkuspána. Slíkt tómlæti – að ræða ekki við notendur – geti ekki annað en orsakað ósamræmi á milli opinberrar raforkuspár og raunverulegrar raforkuþarfar notenda og því þurfi að breyta. Hann segir það blasa við að slík raforkuspá missi marks og ákvarðanir byggðar á orkuspánni leiði til orkuskorts. Slíkar skerðingar munu óhjákvæmilega þýða rask á daglegu lífi landsmanna og minni sköpun verðmæta, sem bitni á lífsgæðum landsmanna til lengri tíma litið.
Í niðurlagi greinar sinnar segir Sigurður að stefnur stjórnvalda og áherslur sem tengjast orkunotkun þurfi að tala saman og taka um leið tillit til stigvaxandi orkuþarfar jafnt atvinnulífs sem heimila í landinu. Eins þurfi að tryggja, eins og forstjóri Landsnets bendi á, að ábyrgð á nægjanlegu afli sé skýr og hafi skilvirkni raforkukerfisins að leiðarljósi. Úrbóta sé sannarlega þörf.
Hér er hægt að lesa grein Sigurðar í heild sinni.
Fáum við leyfi þitt til að nota Google Analytics til að safna nafnlausum upplýsingum um notkun þína á þessum vef?
Sjáðu nánar á persónuverndarsíðu okkar hvaða áhrif svar þitt hefur.
