Aðalfundur Samtaka leikjaframleiðenda, IGI, var haldinn síðastliðinn miðvikudag að loknum opnum rafrænum fundi um framtíðarhorfur og tækifæri í tengslum við uppbyggingu tölvuleikjaiðnaðar hér á landi.
Þorgeir F. Óðinsson, framkvæmdastjóri Directive Games, var kosinn formaður IGI á aðalfundinum en hann tekur við af Vigni Erni Guðmundssyni frá CCP. Þorgeir er á myndinni hér fyrir ofan.
Nýjar hagtölur tölvuleikjaiðnaðar voru kynntar á opna viðburðinum og áttu sér stað áhugaverðar pallborðsumræður um stöðu, horfur og áskoranir í tölvuleikjaiðnaði. Nýr vefur IGI var einnig opnaður.
Birgir Ísleifur Gunnarsson, ljósmyndari, tók myndir á rafræna fundinum sem sendur var út frá Grósku í Vatnsmýrinni.
