Flokkarnir boða áframhaldandi stuðning við iðn- og tækninám
Allir þeir átta flokkar sem tóku þátt í kosningafundi SI undir yfirskriftinni Hugmyndalandið eru sammála um uppbyggingu menntakerfisins þegar horft er til könnunar sem gerð var meðal flokkanna.
Allir flokkarnir áforma að styðja áframhaldandi uppbyggingu húsnæðis við iðn- og verknámsskóla til að mennta fleiri iðn- og tækninema.
Þeir eru einnig sammála um að auka fjármagn til iðn- og verknámsskóla til að mennta fleiri iðn- og tækninema. Þá er enginn ágreiningur milli flokkanna þegar kemur að því að styðja hvata til háskóla til að mennta og útskrifa fleiri nemendur í STEAM greinum, þar eru allir flokkar sammála.
Jafnframt áforma allir flokkarnir að beita sér fyrir innleiðingu gagnvirkra menntatæknilausna í grunnskólum til að bæta gæði kennslu og undirbúa nemendur fyrir stafræna framtíð.
Sjálfstæðisflokkur einn flokka vill ekki svara því hvort flokkurinn áformi að efla eftirlit með starfsemi réttindalausra í iðngreinum. Allir aðrir flokkar áforma slíkt.
Hér er hægt að nálgast niðurstöður fleiri spurninga sem lagðar voru fyrir flokkanna.
Formenn og fulltrúar átta flokka tóku þátt í umræðum á kosningafundi SI í Silfurbergi í Hörpu. Sigurður Hannesson, framkvæmdastjóri SI, stýrði umræðunum.