Fréttasafn: 2009 (Síða 3)

Ársfundur ASÍ stendur nú yfir. Í gær flutti félagsmálaráðherra ræðu þar sem hann hefur væntanlega ætlað að gefa tóninn fyrir lokasprettinn til að halda lífinu í stöðugleikasáttmálanum. Vonandi er ræða hans ekki til marks um viðhorf ríkisstjórnarinnar í þeim efnum.

Á síðasta sviðsstjórnarfundi prenttæknisviðs létu þeir Sveinbjörn Hjálmarsson og Kristján G. Bergþórsson af setu í sviðsstjórn. Í þeirra stað koma Sölvi Sveinbjörnsson og Guðbrandur Magnússon.

Í samstarfi Hátækni- og sprotavettvangs, þingflokka stjórnmálaflokka, ráðuneyta iðnaðar, utanríkis, mennta- og fjármála, háskóla og aðila stoðkerfis og atvinnulífs verður efnt til Hátækni-og sprotaþings 2009 föstudaginn 6. nóvember nk. Á þinginu verður fjallað um stöðu og starfsskilyrði hátækni- og sprotafyrirtækja á Íslandi.

Íslendingar þurfa að gera það upp við sig hvort þeir ætla að freista þess að koma sér hratt upp úr kreppunni eða stefna enn lengra niður í öldudal tekjuminnkunar, atvinnuleysis, niðurskurðar, skattpíningar og samdráttar. Til þess að leiðin geti legið hratt upp þarf að nýta þau tækifæri sem við höfum til nýrrar verðmætasköpunar í atvinnulífinu á næstu misserum. Þetta segir Helgi Magnússon, formaður SI í grein í Morgunblaðinu í dag.

Um 100 tonn af íslensku sælgæti er flutt út árlega. Þetta kemur fram í frétt á mbl.is. Það eru Nói Siríus og Freyja sem selja mest úr landi af íslensku sælgætisframleiðendunum. Forsvarsmenn fyrirtækjanna verða varir við mikinn áhuga erlendis frá en þau selja mikið til Norðurlandanna auk þess sem Nói selur m.a. til Whole Foods í Bandaríkjunum.

Á þriðja tug fyrirtækja mættu á fund um handleiðsluverkefni fyrir meðlimi Samtaka upplýsingatæknifyrirtækja (SUT) sem Útflutningsráð Íslands og SUT stóðu fyrir í síðustu viku.

Samtök iðnaðarins auglýsa styrki til iðnfyrirtækja sem annast vinnustaðakennslu. Styrkirnir eru veittir til að efla kennslu og þjálfun í iðngreinum sem fyrirtæki hafa þörf fyrir en erfitt er að fá nemendur í.

Í spjallþættinum Hrafnaþing, sl. föstudag tók framkvæmdastjóri SI þátt í umræðum svokallaðrar Heimastjórnar. „Þar varð mér fótaskortur í fullyrðingum um skattgreiðslur útgerðarfyrirtækja“, segir Jón Steindór, „það er mér bæði ljúft og skylt að leiðrétta.“

„FJÖREGG MNÍ” var veitt á Matvæladegi 2009, 15. október sl., fyrir lofsvert framtak á matvæla og næringarsviði. „Fjöreggið” er íslenskt glerlistaverk, hannað og framleitt hjá Gleri í Bergvík. Samtök iðnaðarins gáfu verðlaunagripinn.

Þriðjudaginn 20. október efna SA og umhverfisráðuneytið til opins umræðu- og kynningarfundar um skýrslu sérfræðinganefndar um möguleika til að draga úr útstreymi gróðurhúsalofttegunda. Fundurinn fer fram á Grand Hótel Reykajvík (Háteig) og hefst kl. 13 og stendur til kl. 15.

Ráðstefna Vinnuverndarvikunnar 2009 ÁHÆTTUMAT FYRIR ALLA verður haldin á Grand Hótel, Gullteigi, þriðjudaginn 20. október frá kl. 13.00-16.00

Samtök iðnaðarins hafa þýtt náms- og færnikröfur iðnmeistara á ensku. Töluvert er um að iðnmeistarar leiti sér vinnu erlendis eða hugleiði að gera slíkt. Mikilvægt er að þeir geti þá sýnt fram á þekkingu sína og hæfni, t.d. með yfirliti um menntun og fyrri störf.

Hart hefur verið deilt á umhverfisráðherra fyrir ákvörðun hans um að fella úr gildi ákvörðun Skipulagsstofnunar um Suðvesturlínur. Efast hefur verið um lögmæti og réttmæti þeirrar ákvörðunar m.a. af Samtökum iðnaðarins. Ef rýnt er í nokkur atriði í tengslum við úrskurð ráðherra um að fella úrskurð Skipulagsstofnunar um að ekki skuli fara fram sameiginlegt umhverfismat á framkvæmdum sem tengjast álveri í Helguvík kemur fljótt í ljós að á honum eru svo miklir annmarkar að allar líkur benda til þess að hún sé ólögmæt.

Ekki verður annað séð en að það sé stefna ríkisstjórnarinnar að vinna markvisst gegn áliðnaði og öðrum orkufrekum iðnaði á Íslandi í bráð og lengd. Ákvarðanir um að framlengja ekki viljayfirlýsingu vegna Bakka, fella úr gildi ákvörðun Skipulagsstofnunar um Suðvesturlínur og tillaga um orku- og auðlindaskatt koma fyrirhuguðum framkvæmdum í uppnám segir Jón Steindór Valdimarsson framkvæmdastjóri SI.

Þessa dagana er verið að markaðsetja nýja íslenska hönnunar- og framleiðslulínu sem hefur að gera með lýðheilsu í hátæknisamfélagi. Vörulínan er sniðin að þörfum þeirra sem nota fartölvur daglega og samanstendur af brettum undir fartölvur og dagblaða- og bókastöndum og er hönnuð í nánu samráði við lækna og iðjuþjálfa. Vörurnar eru framleiddar í Múlalundi.

Starfsmenn SI hafa á gert könnun meðal stærstu félagsmanna sinna um ástand og horfur. Svör bárust frá 140 félagsmönnum. Störfum hefur fækkað um 632 frá upphafi árs og til áramóta er búist við annarri eins fækkun og hefur þá starfsmönnum fækkað um 13,5% frá upphafi til loka árs.

Svana Helen Björnsdóttir framkvæmdastjóri Stika og Vilborg Einarsdóttir framkvæmdastjóri Mentors munu hitta Viktoríu krónprinsessu Svíþjóðar í viðhafnarkvöldverði í dag. Þær hafa verið valdar fulltrúar íslenskra kvenfrumkvöðla í Evrópuverkefninu EU Network of Female Entrepreneurship Ambassadors ásamt Höllu Tómasdóttur og Kristínu Pétursdóttur frá Auði Capital.

Í fjárlagafrumvarpinu er að finna skuggaleg tíðindi um skattastefnu stjórnvalda. Ekki verður betur séð en þannig sé gengið fram að það leiði til enn frekari stöðnunar og samdráttar. Augljóst er að umsvif í atvinnulífinu munu dragast enn saman og fjárfestingar tengdar orkunýtingu verða í uppnámi.

Hvatningarráðstefna Stjórnvísi verður haldin á Grand hótel 2. október, kl. 8.30-11.30. Markmið ráðstefnunnar er að hvetja stjórnendur til djörfungar og bjartsýni. Stjórnendur og aðrir áhugasamir um stjórnun og rekstur fyrirtækja eru velkomnir. Aðgangur er ókeypis.