Fréttasafn (Síða 242)

Menntaverðlaun atvinnulífsins voru veitt í fyrsta sinn í dag til fyrirtækja sem hafa staðið sig vel á sviði fræðslu- og menntamála. Samskip voru útnefnd sem Menntafyrirtæki ársins 2014 en ferðaþjónustufyrirtækið Nordic Visitor var útnefnt Menntasproti ársins 2014.

Menntun og fræðsla sem nýtist öllu atvinnulífinu verður í kastljósinu í dag á Menntadegi atvinnulífsins. Um 300 manns úr atvinnulífi, stjórnmálum og menntakerfinu hafa boðað komu sína á ráðstefnu um menntamál atvinnulífsins sem hefst kl. 13 á Hilton Reykjavík Nordica.

Tilkynnt var um vinningshafa Game Creator – keppni um besta tölvuleikinn – á Háskóladögum í Háskólanum í Reykjavík sl. laugardag. Liðið Indjánagil hlaut 1. verðlaun fyrir leikinn Skuggasveinn.

Íslandsmót iðn- og verkgreina verður haldið í Kórnum í Kópavogi  6. – 8. mars 2014 og er keppnin sú stærsta til þessa. Framhaldsskólar landsins taka þátt í mótinu og verða með kynningu á starfsemi sinni. Foreldrar og forráðamenn eru hvattir til að nýta þetta einstaka tækifæri og mæta með börnum sínum til að kynna sér fjölbreytt námsframboð.

Samtök iðnaðarins mótmæla ákvörðun ríkisstjórnarinnar um algjör slit á aðildarviðræðum við ESB. Með henni fer ríkisstjórnin gegn stórum hópi iðnfyrirtækja sem vilja að skoðað verði til hlítar hvort samkeppnishæfni þeirra sé betur tryggð innan ESB eða utan, og hvort ekki megi ná samningum þar sem staðinn er vörður um hagsmuni Íslands.

Í Morgunblaðinu í dag er aðsend grein eftir  Þorstein Einarsson, hæstarréttarlögmann þar sem kemur fram að almennur fyrningarfrestur krafna er fjögur ár og að öllu óbreyttu fyrnast því kröfur sem aðilar kunna enn að eiga vegna ólögmætrar gengistryggingar lánssamninga hinn 16. júní 2014.

Íris Björk Óskarsdóttir hjá Sveinsbakaríi bar sigur úr býtum í keppni um Köku ársins sem Landssamband bakarameistara efnir árlega til. Ragnheiður Elín Árnadóttir, iðnaðar- og viðskiptaráðherra, fékk fyrstu kökuna afhenta í ráuneytinu í gær.

Í dag verða styrkir úr sjóðnum Forritarar framtíðarinnar afhentir í Ráðhúsinu í Reykjavík.  Ragnheiður Elín Árnadóttir iðnaðar- og viðskiptaráðherra afhendir styrkina í viðurvist kennara og barna frá þeim grunnskólum sem hlutu styrkina að þessu sinni.

Við hjá Samtökum iðnaðarins erum sammála öðrum hagsmunasamtökum í íslensku efnahagslífi þegar við teljum stöðugleika vera eitt helsta markmið efnahagsstefnu næstu ára. Þarna er vísað til almenns rekstrarumhverfis og helstu hagvísa. Svana Helen Björnsdóttir skrifar í Fréttablaðið.

Samtök iðnaðarins ásamt sjö atvinnulífssamtökum í húsi atvinnulífsins efna til Menntadags atvinnulífsins mánudaginn 3. mars. Menntun og fræðsla sem nýtist öllu atvinnulífinu verður þar í kastljósinu en þetta er í fyrsta sinn sem fulltrúar ólíkra atvinnugreina halda sameiginlegan menntadag.

Fullt var út úr dyrum á Útboðsþingi Samtaka iðnaðarins á Grand Hótel í dag. Af kynningum á fyrirhuguðum framkvæmdum má ráða að heldur sé að birta til á bygginga- og verktakamarkaði.

Þegar haft er í huga hve brotfall nemenda er mikið í þeim framhaldsskólum landsins sem byggja alfarið á bóknámi, er sorglegt að ekki skuli vera hægt að kynna betur tækifærin í verk- og tækninámi. Svana Helen Björnsdóttir skrifar tækifærin í iðnaði.

Undirbúningshópur að samráðsvettvangi um álklasa hittist í fyrsta skipti í fundaraðstöðu Samtaka iðnaðarins og Samáls fimmtudaginn 13. nóvember. Þar voru saman komnir fulltrúar nokkurra lykilfyrirtækja úr ólíkum greinum, sem allar eiga það sammerkt að starfa í áliðnaðinum.

Fullt var út úr dyrum á morgunfundi Litla Íslands sem fram fór í Húsi atvinnulífsins í morgun. Litla Ísland er vettvangur smárra fyrirtækja sem vinna saman óháð atvinnugreinum. Á undanförnum vikum og mánuðum hefur Litla Ísland unnið að viðtækri stefnumótun. Niðurstöðum þeirrar vinnu má lýsa í einni setningu: Stóra lausnin í atvinnumálum þjóðarinnar er smá.

Nýsköpunarverðlaun forseta Íslands 2014 voru veitt við hátíðlega athöfn á Bessastöðum í gær, 13. febrúar. Verkefnið sem hlaut verðlaunin að þessu sinni heitir Hjólaleiðir á Íslandi og var það unnið af Evu Dís Þórðardóttur úr Háskólanum í Reykjavík og Gísla Rafni Guðmundssyni nemanda í Háskólanum í Lundi, Svíþjóð.

Um 9 þúsund manns mættu á opið hús UT messunnar laugardaginn 8. febrúar. Ríflega 850 manns voru á ráðstefnu UTmessunnar sem haldin var á föstudeginum og tókst gífurlega vel.

Útboðsþing Samtaka iðnaðarins verður haldið á Grand Hótel Reykjavík föstudaginn 14. febrúar kl. 13.00 - 16.30. Á þinginu verður gefið yfirlit yfir helstu útboð opinberra aðila á verklegum framkvæmdum.

Föstudaginn 27. febrúar sl. stóðu Ljóstæknifélag Íslands og Samtök rafverktaka fyrir málþingi um lýsingarhönnun í þéttbýli í Tjarnarbíói. Á sama tíma voru innflytjendur ljósabúnaðar með vörusýningu í Ráðhúsi Reykjavíkur. Atburður þessi var hluti af Vetrarhátíð í Reykjavík 2014.

Region Midtjylland hefur undirritað samning við ICEconsult um notkun á fasteigna og aðstöðukerfinu MainManager. Kerfið verður notað til að hagræða og halda utanum rekstur og viðhald á eignasafni Region Midtjylland, sem telur yfir 1.200.00 fermetra.

Rakel Sölvadóttir, stofnandi Skemu, hlaut verðlaunin „Skapandi ungir frumkvöðlar“ sem JCI á Íslandi veitti í fyrsta sinn í síðustu viku. Verðlaunin afhenti Ragnheiður Elín Árnadóttir viðskipta- og iðnaðarráðherra við hátíðlega athöfn í húsakynnum Arion banka við Borgartún.