Fréttasafn (Síða 125)

Rafræn viðskipti hafa verið stunduð á Íslandi árum saman, en fyrirtæki og stofnanir hafa um tuttugu ára skeið sent á milli sín rafrænar tollskýrslur, reikninga og pantanir byggðar á EDI (Electronic Data Interchange) staðlinum. Með eflingu veraldarvefsins hafa þau styrkst og tekið á sig nýjar myndir þannig að skilgreining hugtaksins verður sífellt torveldari.

Bókasamband Íslands hefur gert könnun á prentstað íslenskra bóka sem getið er í Bókatíðindum Félags íslenskra bókaútgefenda 2009. Mikil fjölgun hefur orðið á prentun titla innanlands frá síðasta ári eða um 26% prósentustig. Um er að ræða hæsta hlutfall á prentun bókatitla innanlands frá því að könnun þessi var gerð fyrst árið 1998.

Í dag komst kærunefnd útboðsmála að þeirri niðurstöðu að Ríkiskaup f.h. Landspítalans skyldi gert að auglýsa á nýjan leik útboð á matsölu til starfsmanna Landspítala. Ríkiskaup höfðu tekið þá ákvörðun að undangengu útboðinu að ganga til samninga við Sælkeraveislur ehf., sem var næstlægstbjóðandi í útboðinu. Jafnframt var tilboði lægstbjóðanda, Sláturfélags Suðurlands svf. (SS) vísað frá.

Samtök iðnaðarins hafa gagnrýnt harkalega skattastefnu stjórnvalda er lýtur að skattlagningu matvæla, hækkun vsk á tilteknum matvælum og álagningu vörugjalda. Það er með miklum ólíkindum hvernig yfirmaður eftirlitssviðs ríkisskattstjóra dylgjar um rekstur og ákvarðanir einstaks fyrirtækis og stjórnenda þess. Samtök iðnaðarins ætlast til þess að ríkisskattstjóri sjái til þess að slíkt endurtaki sig ekki.

Launafl ehf. hefur náð þeim árangri að fá C- vottun SI sem staðfestir að reksturinn er í góðum höndum, studdur með öflugu verkbókhaldi, góðri skipulagningu og með mikla sérstöðu varðandi áherslum í öryggis- og heilbrigðismálum. Samhliða úttekt vegna C-vottunar var gerð forúttekt á þrepi B sem vekur væntingar um að ekki líði á löngu þar til Launafl ehf. verði komið með B- vottun.

Þeir sem vinna með umhverfismál velta stundum fyrir sér af hverju umhverfisvottanir fyrirtækja eru ekki vinsælli hérlendis en raun ber vitni. Ein ástæðan er talin vera sú að íslensk fyrirtæki eru mörg hver lítil og kerfin sem í boði eru henta betur stærri fyrirtækjum. Bæði ISO 14001 og Svanurinn hafa nokkuð stífar kröfur um skráningar og innra skipulag í fyrirtækinu sem vex í augum margra.

Trésmiðjan AKUR á Akranesi hélt upp 50 ára afmæli fyrirtækisins í nóvember með veislu þar sem starfsfólk, eigendur og fyrrum stofnendur fyrirtæksins fögnuðu tímamótunum.

Það er gleðilegt að forsætisráðherra, Jóhanna Sigurðardóttir, hefur lýst yfir eindregnum vilja til þess að greiða götu framkvæmda á Suðurnesjum. Samtök iðnaðarins taka heilshugar undir sjónarmið forsætisráðherra.

Ræstingarsvið ISS Ísland hefur fengið vottun Norræna umhverfismerkisins Svansins fyrir ræstingarþjónustu. Strangar kröfur Svansins tryggja að fyrirtækið er í fremstu röð hvað varðar lágmörkun neikvæðra umhverfis- og heilsuáhrifa starfseminnar. ISS Ísland sem starfar á sviði fasteignaumsjónar er jafnframt fyrsta ISS fyrirtækið á heimsvísu til að fá slíka vottun. Umhverfisráðherra veittil eyfið föstudaginn 20. nóvember sl. í húsnæði ISS.

Samtök iðnaðarins og MÁLMUR – samtök fyrirtækja í málm- og skipaiðnaði hafa sent erindi til Samkeppniseftirlitsins þar sem óskað er að tryggt verði að uppbygging og rekstur skipalyftunnar í Vestmannaeyjum verði ekki niðurgreiddur úr hafnarsjóði eða bæjarsjóði eins og stefnt er að.

Í opnu bréfi til allra alþingismanna óska íslensk framleiðslufyrirtæki eftir jafnrétti og réttlæti í þeirra garð, starfsfólks og viðskiptavina. Þingmenn eru hvattir til að hverfa frá þeirri mismunun sem felst í því að velja að geðþótta sí og æ sömu vörur gamalgróinna íslenskra iðnfyrirtækja og skattleggja þær sérstaklega.

Föstudaginn 20. nóvember fer fram Dagur ungra fræðimanna í Evrópumálum á vegum Alþjóðamálastofnunar og Samtaka iðnaðarins. Málþingið verður í fyrirlestrarsal 132 í Öskju, frá klukkan 13 til 16. Þarna gefst ungum og/eða nýútskrifuðum fræðimönnum tækifæri til að kynna rannsóknarverkefni sín á sviði Evrópufræða. Þetta er í fjórða sinn sem dagurinn er haldinn.

Aðalfundur Samtaka íslenskra líftæknifyrirtækja var haldin á dögunum. Kosinn var nýr formaður samtakanna, Jóhannes hjá Genís. Þá gekk Ása Brynjólfsdóttir hjá Bláa Lóninu heilsuvörum í stjórn og Jakob K. Kristjánsson hjá Prókatín situr áfram í stjórninni. Einar Mäntylä hjá ORF Líftækni eru þökkuð vel unnin störf en hann hefur setið í stjórn SÍL í fimm ár, seinustu tvö árin sem formaður.

Fenúr og Félag umhverfisfræðinga efnir til málþings um neyslu og úrgangsmál undir yfirskriftinni Umbúðalaus umræða föstudaginn 20. nóvember, kl. 10.00 - 16.00 í Sunnusal á Hótel Sögu. Markmiðið er að vekja umræðu um stöðu neyslumenningar og úrgangsmála hérlendis.

Í sumar ákvað ríkisstjórnin að endurvekja gamla vörugjaldskerfið, reyndar með tvöföldum þunga, og leggja gjöld á ýmsar matvörur. Það var gert undir formerkjum lýðheilsu og þess að verið væri að skattleggja óhollustu. Þrátt fyrir hörð mótmæli, ekki síst úr ranni Samtaka iðnaðarins, var ákveðið að fara þessa leið.

Fulltrúar fyrirtækja, stuðningsaðila og alþingismenn troðfylltu húsakynni CCP á Hátækni- og sprotaþingi 2009 sem fór fram föstudaginn 6. nóvember. Það ríkir engin kreppa í hugarfari stjórnenda þessara fyrirtækja, heldur trú á bjarta framtíð. Árangurinn blasir líka við þrátt fyrir erfið rekstrarskilyrði á undanförnum árum.

Á þessu ári eru 40 ár síðan framleiðsla á áli hófst á Íslandi. Árleg framleiðslugeta áliðnaðarins á Íslandi er nú um 800.000 tonn en til samanburðar eru árlega framleiddar um 40 milljónir tonna af áli í heiminum. Á síðasta ári námu tekjur af útflutningi áls 182 milljörðum króna eða um 40% af vöruútflutningstekjum.

Alþjóðleg ráðstefna um matvælaframleiðslu á Norðurlöndum „Nordic values in the Food Sector; The way forward in a global perspective“ verður haldin á Grand Hótel Reykjavík 16. – 17. nóvember nk., en ráðstefnan er liður í formennskuáætlun Íslands í norrænu samstarfi um matvælamál.

Í tilefni af norræna loftslagsdeginum efna Kolviður og Reyst til málþings í húsi Orkuveitu Reykjavíkur, Bæjarhálsi 1, kl. 8.30-12.00 miðvikudaginn 11. nóvember.