Fréttasafn (Síða 272)

Kaffitár og Starfsafl, starfsmenntasjóður Samtaka atvinnulífsins og Flóabandalagsins, hlutu Starfsmenntaverðlaunin í flokki  félagasamtaka og einstaklinga fyrir verkefnið Fræðslustjóri að láni. Starfsmenntaverðlaunin eru veitt þeim sem vinna að framúrskarandi verkefnum í fræðslumálum og starfsmenntun.

Gámaþjónustan kynnti í morgun nýja kynslóð söfnunarbíla fyrir úrgang og endurvinnsluefni. Búnaður bílsins er frá Norba í Svíþjóð og er hann sá fyrsti sinnar tegundar á Íslandi.

Samtök iðnaðarins hafa tekið saman meðfylgjandi yfirlit yfir helstu breytingar á sköttum og gjöldum sem tóku gildi nú um áramótin og  hafa áhrif á félagsmenn. Ekki er um endanlega upptalningu að ræða og er þeim sem vilja kynna sér málið frekar bent á vefi alþingis og ríkisskattstjóra.

Rannveig Rist, forstjóri Rio Tinto Alcan á Íslandi, hlýtur Viðskiptaverðlaun Viðskiptablaðsins í ár og hugbúnaðarfyrirtækið Betware Frumkvöðlaverðlaunin.

Árni Páll Árnason, efnahags- og viðskiptaráðherra afhenti verðlaunin við árlega athöfn í hádeginu í dag.

Frjáls verslun hefur valið Valdimar Hafsteinsson, framkvæmdastjóra Kjöríss, mann ársins í íslensku atvinnulífi. Valdimar hlýtur þennan heiður fyrir mikla fagmennsku í rekstri, ráðdeild, dugnað, hófsemi og útsjónarsemi.

Skrifstofa SI verður lokuð á morgun 23. desember og á aðfangadag. Skrifstofan opnar aftur mánudaginn 27. desember.

Verðbólga mælist nú 2,5% sem jafngildir verðbólgumarkmiði Seðlabankans. Þetta er í fyrsta skipti síðan í apríl 2004 sem þessu marki er náð. Vísitala neysluverðs í desember hækkaði um 0,33% samkvæmt tölum Hagstofunnar og skýrist að mestu leyti af hækkun bensínverðs.

Alþingi hefur samþykkt ársframlengingu á 100% endurgreiðslu VSK af vinnu á byggingastað.

Samtök iðnaðarins hafa hvatt ráðuneytið til framlengja heimildinni sem skilað hefur auknum umsvifum á byggingamarkaði

Milljónasta tonnið var framleitt í álveri Alcoa Fjarðaáls í Reyðarfirði í vikunni, en framleiðsla hófst í álverinu  í apríl 2007. Verðmæti milljón tonna af áli eru um 265 milljarðar króna miðað við álverð á markaði og gengi dollarans nú, en verðmæti útfluttra afurða frá Fjarðaáli frá upphafi nemur um 260 milljörðum króna.

Þann 16. desember afhenti Prenttæknistofnun, Upplýsingatækniskólanum nítján iMac tölvur til nota við kennslu í upplýsinga- og fjölmiðlagreinum. Tölvurnar koma sér vel því nauðsynlegt var að endurnýja tölvukost skólans.

Nýtt víðtækt samkomulag um leiðir við úrvinnslu skuldamála lítilla og meðalstórra fyrirtækja verður kynnt á opnum fundi á Grand Hótel Reykjavík föstudaginn 17. desember kl. 8:30-10:00.

Umhverfisráðherra hefur staðfest ákvörðun Umhverfisstofnunar um leyfi fyrir ORF Líftækni til  að rækta erfðabreytt bygg í Gunnarsholti, en nokkrir aðilar höfðu kært leyfisveitinguna. ORF Líftækni fagnar þessum úrskurði ráðherra og að nú hafi óvissu um áframhaldandi akuryrkju verið eytt.

Ný mannvirkjalög hafa verið samþykkt á Alþingi. Lögin öðlast gildi 1. janúar 2011. Ljóst er að vinnu við nýja byggingareglugerð verður ekki lokið fyrir gildistökuna eins og áætlað var. Á meðan gildir núverandi byggingareglugerð þegar hún á við.

 

Þrjú fyrirtæki bættust í hóp vottaðra fyrirtækja innan SI í haust. GT tækni og Trésmiðjan Akur hafa hlotið B vottun og Blikksmiðja Guðmundar D vottun.

Vottunarstofan Tún hefur staðfest að fyrirtækið Bústólpi ehf. uppfylli kröfur um

lífrænar aðferðir við framleiðslu á kjarnfóðri. Vottorð þessa efnis var formlega afhent í vinnslustöð fyrirtækisins á Akureyri í dag.

Ný stjórn Samtaka íslenskra líftæknifyrirtækja var kosin á aðalfundi félagsins á dögunum. Formaður samtakanna, Jóhannes Gunnarsson hjá Genís, situr áfram frá fyrra ári ásamt Ásu Brynjólfsdóttur hjá Bláa Lóninu heilsuvörum.

 

Hundruð  starfa á næsta ári voru tryggð þegar ríkisstjórnin samþykkti á föstudag hefja framkvæmdir við fjögur stór samgönguverkefni til viðbótar við hefðbundnar framkvæmdir Vegagerðarinnar sem unnar eru samkvæmt vegaáætlun. Alls á að verja 40 miljörðum króna til þessara verkefna á allra næstu árum.

 

„Samtök iðnaðarins fagna ákvörðun ríkisstjórnarinnar að hefja þessar framkvæmdir sem eru í senn mannaflsfrekar, sem ekki veitir af, en einnig og ekki síður að þær eru arðbærar og styrkja samkeppnishæfni íslensks samfélags í framtíðinni“ segir Helgi Magnússon formaður Samtaka iðnaðarins.

Íslenskir matvælaframleiðendur tóku höndum saman í tilefni af Ári nýsköpunar síðastliðna helgi og kynntu fyrir landsmönnum íslenska matvælaframleiðslu. Fjöldi fólks lagði leið sína í opin hús og Smáralind og kynntu sér framleiðslu og starfsemi fyrirtækjanna.