Fréttasafn (Síða 271)

SagaMedica-Heilsujurtir ehf. hlaut nýverið veglegan Brúarstyrk frá Tækniþróunarsjóði til markaðssetningar á náttúruvörunni SagaPro í Kanada. Styrkurinn varð til þess að nú fer íslensk náttúruvara í fyrsta sinn í landsdreifingu á Kanadamarkaði.

Samtök atvinnulífsins vilja koma eftirfarandi á framfæri og leiðrétta misskilning, sem fram hefur komið í fjölmiðlum undanfarna daga. Samtök atvinnulífsins eru fylgjandi þeirri sáttastefnu, sem ríkisstjórn Jóhönnu Sigurðardóttir markaði og hrinti í framkvæmd með stofnun og starfi endurskoðunarnefndar um stjórn fiskveiða.

Við brotthvarf iðnaðarmálagjaldsins urðu miklar breytingar á tekjuöflun SI. Undanfarin misseri hefur verið unnið að hagræðingaraðgerðum til mæta breyttum aðstæðum. Um síðustu mánaðarmót létu þrír starfsmenn SI af störfum og nýtt skipurit tók gildi.

ORF Líftækni hf er tíu ára í dag. Fyrirtækið var stofnað 1. febrúar 2001 til að þróa nýstárlega aðferð við framleiðslu verðmætra, sérvirkra próteina í erfðabreyttu byggi. Átta þingmenn hafa lagt fram þingsályktunartillögu um að útiræktun á erfðabreyttum lífverum verði bönnuð. Verði tillagan samþykkt kemur hún í veg fyrir áætlanir um akuryrkju og nýsköpun í grænum iðnaði á landsbyggðinni.

Háskólinn í Reykjavík, í samvinnu við Össur hf., Samtök iðnaðarins, Klak - nýsköpunarmiðstöð atvinnulífsins, Landsvirkjun og Eyri Invest ehf., kallar eftir hugmyndum sem gætu orðið FRÆ ÁRSINS 2011. Fræ ársins er útnefnt árlega, en markmið þess er að styðja við frumstig nýsköpunar með því að gefa frumkvöðlum tækifæri til að breyta hugmynd eða frumgerð í viðskiptaáætlun og sprotafyrirtæki.

Samtökin í Húsi atvinnulífsins að Borgartúni 35 hafa undirritað rammasamning við Skýrr um innleiðingu á símalausn fyrir húsið. Símalausnin byggir á IP-tækni er sameinar síma- og tölvuumhverfi fyrirtækja og stofnana.

Föstudaginn 28. janúar undirrituðu Katrín Jakobsdóttir menntamálaráðherra og Hildur Elín Vignir framkvæmdastjóri IÐUNNAR  þjónustusamning milli mennta- og menningarmálaráðuneytis og IÐUNNAR fræðsluseturs. Samningurinn tekur til umsýslu sveinsprófa, umsýslu, skráningar og eftirlits með samningum um vinnustaðanám auk framkvæmdar annarra lokaprófa svo sem fagprófa í iðngreinum.

Sú var tíð að íslenskur iðnaður og sjávarútvegur tókust á um kvótakerfið og sjávarútvegsstefnu landsmanna. Þeirri umræðu er ekki lokið og mikilvægt er að sem best sátt náist um auðlindastefnu Íslendinga, jafnt til lands og sjávar. Helgi Magnússon, formaður SI fjallaði um málið í grein í Morgunblaðinu. 

Íslenska sprotafyrirtækið MindGames ehf varð í desember fyrst í heiminum til að selja iPhone forrit (e. app) sem nýtir hugarorku notandans og nefnist það Tug of Mind. Leikurinn var fyrst kynntur á alþjóðlegri leikjaráðstefnu í San Francisco á síðasta ári við mjög góðar undirtektir og er frekari þróun fyrirhuguð.

Í norrænu verkefni sem lauk fyrir stuttu var skoðað hvernig fyrirtæki geta boðið vörur og þjónustu þannig að minni umhverfisáhrif hljótist af en með hefðbundnum aðferðum.  Einkum var horft til fyrirtækja sem bjóða þjónustu í tengslum við vörur sínar í meira mæli en vörur eingöngu. Skoðað var hvernig það leiðir til minni efnisnotkunar og þannig minni umhverfisáhrifa.

DataMarket hefur hafið miðlun á alþjóðlegum gögnum á vefsíðu sinni. Þar geta notendur nú nálgast á einum stað gögn frá mörgum af mikilvægustu gagnaveitum heims: Aðilum á borð við Sameinuðu Þjóðirnar, Alþjóðabankann, Eurostat og fleiri.

Kæligátt er ný upplýsingaveita Matís með hagnýtum leiðbeiningum og umfjöllun um kælingu og meðhöndlun á fiski á öllum stigum virðiskeðjunnar frá miðum á markað. Leiðbeiningarnar eru settar fram á notendavænan hátt og eiga vonandi eftir að nýtast sjómönnum, framleiðendum og flutningsaðilum og einnig koma að gagni við fræðslu og námskeiðahald á þessu sviði.

Ný samtök í heilbrigðisiðnaði, SHI, voru stofnuð í gær. Þau munu starfa sem starfsgreinahópur innan SI en eitt af verkefnum samtakanna er efla samstarf innan heilbrigðisklasans með bætta þjónustu, hagræðingu, verðmætasköpun og útflutning að leiðarljósi. 

Netleikurinn EVE Online hefur verið valinn frumlegasti leikur ársins 2010 af lesendum leikjavefsíðunnar MMORPG.com. Lesendurnir fengu tækifæri til þess að kjósa á milli fimm leikja og hlaut EVE Online 32,7% allra atkvæða.

Í ljósi efnahagsástandsins og niðurfellingar iðnaðarmálagjalds hefur stjórn SI ákveðið að auka afslætti af félagsgjöldum. Iðnaðarmálagjaldið kom áður til frádráttar af félagsgjöldum til Samtakanna. 

Stöðugt fjölgar í hópi vottaðra fyrirtækja innan SI. Skömmu fyrir jól bættust þrjú fyrirtæki í hópinn þegar Rafey ehf., SÁ verklausnir og G. Helgason hlutu D-vottun.  

Actavis á Íslandi hefur lokið við að stækka lyfjaverksmiðju sína í Hafnarfirði og eykst framleiðslugetan við það úr einum milljarði taflna í einn og hálfan milljarð taflna á ári. Verksmiðjan var opnuð formlega sl. föstudag að viðstöddum forseta Íslands, herra Ólafi Ragnari Grímssyni.

RB rúm hlaut á dögunum alþjóðleg verðlaun á International Quality Crown Awards í London, fyrir vandaða framleiðslu og markaðssetningu. Þetta eru stór verðlaun en það er bara eitt fyrirtæki í hverri grein sem fær þessi verðlaun ár hvert.

Upplýsingatæknifyrirtækið Skýrr hélt nýársgleði fyrir samstarfsaðila og viðskiptavini síðastliðinn föstudag, 7. janúar. Í aðdraganda gleðinnar var efnt til samkvæmisleiks meðal viðskiptavina fyrirtækisins og NÖRD ÁRSINS valinn.

Á umbrotatímum er mikilvægt að forgangsraða málaflokkum; að veita fjármagni til þeirra hluta sem líklegastir eru til að skila því aftur, hratt og vel. Menntun sem atvinnulífið hefur þörf fyrir á því að setja í öndvegi þegar kreppir að.